شـــــــــــــــــــــــــــــــــــعــــــــــــــــــــــــــــــــــــــــــر

شباب بنات القصيده مره حلوه و تضحك القلب و و اقعيه
................................................................
وردني تالي الليل جـــــــــــــــوال
وانا على شاهي و بسكوت ديمه
الرقم بايخ لكن الصوت قتال
كنه مثل صوت المذيعه حليمه
قالت صباح الخير يا طيب الفال
قلت ارحبي ترحيبه مستديمه
بالعود و الصفر ودلة و الفنجال
واجبك يا بنت الاصول الكريمه
وردت بضحكه ثم قالت وش الحال؟
قالت اشهد ان الحال عقبك سقيمه
قالت و هي تضحك و بعد مثل الاطفال
و انا بعد كني بدونك يتيمه
من يوم قالتها تزلزلت زلزال
من فجعتي كني مسوي جريمه
قالت صوتك ترى مابه ارسال
كذاااب..لكن المصيبه عضيمه
قالت اقول اسمع ترى هرجنا طااال
ممكن تصاحبني تراني وسيمه
و اسمي الحقيقي اول حروف الدال
لكن يسموني البنات الزعيمه
صحيح احب الفخفخه و اعشق المال
لكن...تراني طاهره مستقيمه
ما عندي امغازل و لا (لعب جهال)
ما عندي الافي الشرف و الحشيمه
بس الصراحه قلبي لشوفتك مال
و اصبحت حدك جالس في مصميمه
فكرك بعقلك و اتراك القيل و القال
و احذر تطيع اهل العقول العقيمه
و ارسل علي احين خمسمية ريال
اشحن فيه جوال اختي غنيمه
او طقم غالي فيه خاتم و سلسال
اروح به عرس و لا عزيمه
قالت الحقيقه ماني رجل اعمال
ولا ني بتاجر الموارد عديمه
انا الصراحه شبه عطال بطال
و علاقتي باالفقر جدا حميمه
و الراتب الله يرحم الحال مازال
محدود و المصرف ربي عليمه
و الدين بال لآلآف و البنك شغال
ياكل فلوسي بالربا و الضليمه
و السوق طايح و الغلا ضيق البال
و الموت و الله صاير اكبر غنيمه
قالت تحمل بس الحمال ينشال
خلك شديد الباس صلب العزيمه
ياخي تصرف جعلك اتصير نشال
اهم شي ان النوايه سليمه
لا بد تفهمني على كل الاحوال
مادمت من اهل العقول الفهيمه
قالت ايه و الله فاهم الي على البال
لكن ترى هذي علينا قديمه
يابنت هذا صاير اليوم موال
للي تبي تلعب علي ابن اللئيمه
يابنت ما تدرين كم فيه محتال
يلعب على الحبلين وانتي غشيمه
يابنت كم من جاهل دمعه سال
من عقب ماجات العواقب و خيمه
والبنت لا اقتفى عرضها يبد الانذال
والله ما يبقى لها اي قيمه
قالت تبي ولا افخلك على جال
مهوب ناقصني نصايح حكيمه
عز الله انك للاسف منت رجال
وانك قليل الذوق مافيك شيمه
يا لعنبو اللي ما يسطرك بنعال
حتى يعلمك الغزل يا بهيمه
(تفو)عليك و صكت الخط في الحال
مادري(تفو)هي مدح و لا شتيمه
........................................
و اعذروني على الاقصور